歐協聯：人腳有限傷兵成籮 水晶宮考古要細心_東方日報

今晚歐協聯尾輪焦點戰，英超前列分子水晶宮主場迎戰芬超勁旅古比斯。水晶宮仍要搶分爭前8直接出線資格，但陣中多傷兵之餘，兼有伊斯美拿沙亞回國勤王，攻力受削，面對古比斯都係小勝格局，寧捧3.5球入球細。

（Now 643周五凌晨4時直播）文:法達斯維

水晶宮近年愈踢愈好，接連捧走英足盃及社區盾，並喺聯賽位處上游，主帥格拉斯拿功不可沒，佢哋喺歐協聯獲3勝1和1負排第9位，只落後第8位緬恩斯1分，意味住今仗仍要搶分，先有機會爭前8直入16強嘅入場券。

不過水晶宮始終人腳有限，踢嚟踢去都係嗰班人，缺少輪換下仲要打埋歐協聯，難免出現疲態及傷兵。據報後衞丹尼爾蒙路斯、里奧卡甸斯同中場鐮田大地因傷倦勤，進攻核心伊斯美拿沙亞亦要為塞內加爾征戰即將開打嘅非國盃，今仗唔使預佢，而且呢支倫敦球隊各項賽事近8仗，全開3球或以下，冇埋沙亞攻力再打折扣，加上佢哋48個鐘後就要喺聯賽鬥列斯聯，兵源有限要就住嚟踢。

古比斯踢歐洲賽未夠班
另邊廂，古比斯雖然喺芬超打橫行，但出到歐協聯大舞台明顯未夠班，今屆5戰只得1勝3和1負，入得4粒咁大把，攻力欠銳，但勝在僅失3球，防守唔錯，佢哋依家落後第24位林肯紅魔鬼1分，爭取第9至24名附加賽席位仲有價講，今仗一定守住先。當然以波論波，水晶宮相信可全取3分，但主W得1.09倍咁奀，「讓球主客和」要讓到2球又唔抵玩，轉捧3.5球入球細最上算。