意超盃：A米放開踢半大醒里_東方日報

意超盃4強展開，拿玻里率先對ＡＣ米蘭，今屆繼續安排喺沙特阿拉伯舉行，表演性質及搵銀意味濃厚，參賽球隊一定識做，盡量踢進攻足球娛賓，加上兩隊近5次交鋒有4次上半場總入球開2球或以上，不妨再博中位數1.5球嘅半場大。

（周五凌晨3時開賽）文:Mic少

鬥拿玻里例多波入
意超盃傳統上由意甲冠軍對意大利盃盟主，自2023年開始擴軍至4隊參賽，並喺沙特阿拉伯舉行，變成一項小型賽事。眾所周知，沙特近年大灑金錢發展足運，意盃戲金絕對唔會少，各隊自然更落力踢悅目足球。上季意甲冠軍拿玻里近期成績欠佳，遭遇2連敗兼冇波入，教練干地正好趁機變陣，打造新進攻戰術，希望提升攻力，為之後聯賽爭標做準備。

至於ＡＣ米蘭係上屆意超盃冠軍，身負衞冕重任，爭勝決心有保證，尤其係教練阿里基今夏回巢領軍，當然想盡快有盃捧。A米近期踢法相當開放，近兩場意甲分別贏拖連奴3比2，打和薩斯索羅2比2，並且上半場總入球全開2球或以上。此外，A米中堅馬迪奧加比亞受傷缺陣，失波機會更高，加上兩隊近5次交鋒有4次上半場總入球開2球或以上，一於追1.5球嘅半場大。