女歐聯：祖記女足慣演入球騷_東方日報

女子歐聯上演名牌對決，祖雲達斯女足對曼聯女足，「女斑馬」在女子歐聯5戰獲3勝1和1負 ，全開3球或以上，包括上輪5比0大勝聖普爾頓女足；「女紅魔」今季女子歐聯5戰獲3勝2負，不過近期後防不穩，近5場作客4次開3球或以上，首選2.5球入球大。（周四凌晨4時開賽）文:邪神

祖雲達斯女足今季歐聯係大盤客恩物，5場都開出大盤，包括前仗賽和里昂女足3比3，上輪大炒聖普爾頓女足5蛋。至於曼聯女足同樣入得又失得，上場女子英超就同熱刺女足踢成3比3，今場作客祖記女足隨時又開入球騷。

禾堡進取半大好路
同晚仲有阿仙奴女足作客奧特海維利女足，「女兵」係衞冕之師，但今季女子歐聯開局唔理想，5戰獲3勝2負，現時排中游位置，表現遠遜預期，今場對手實力唔入流，當然希望全取3分。不過阿仙奴女足上輪亦只能1比0小勝川迪女足，今仗就算贏波都係小勝，捧3.5球入球細。最後講埋禾夫斯堡女足對車路士女足，「狼女」係女子歐聯5戰得9分保持出線機會，而且踢法進取，入球必多；「車女」女子歐聯保持不敗，5戰得11分高踞前列，攻入18球與巴塞隆拿女足並列入球最多，翻查雙方對賽，近3次交手半場全開2球或以上，專喺上半場駁火，1.5球半場大好路。（周四凌晨4時開賽）