英聯盃：8強開戰疲兵訪卡城 車仔歎慢板半細睇準出擊_東方日報

英聯盃8強展開，近4屆兩次入決賽嘅車路士，將作客8強入面唯一非英超球隊卡迪夫城。牌面上「車仔」晉級應該冇乜難度，不過佢哋近況一般，而且3日2戰對球員體能需求極大，對住當「弗」嘅卡迪夫城，預計會拖慢節奏，上半場唔會去到盡，開1.5球半場細機會高。（無綫myTV SUPER周三凌晨4時直播）文:工廠仔

車路士今季表現唔穩定，最大原因係過分依賴某幾位主力，好似列斯占士、摩西斯卡些度、祖奧柏度同柏度尼圖等，都冇具質素嘅代替者，喺密集賽程下，主力出現疲態就會令戰力急跌。「車仔」上周六晚喺主場2比0贏完愛華頓後，相隔3日左右又要作客比賽，疲兵出征要撻着唔係咁容易。

車路士前鋒利安戴納早前膊頭重創要長抖，令領隊馬利斯卡變陣空間進一步收窄，而且下場聯賽又要作客紐卡素，冇乜喘息空間，所以今場作客唔會急於求勝，寧願拖慢節奏，用較強控球能力主導戰局，上半場隨時拉鋸。事實上，「車仔」近期踢法偏向慢熱，對上8場比賽，有6場半場總入球開1球或以下。

卡迪夫城鍾意留前鬥後
卡迪夫城喺英甲排榜首，下季大有機會升上英冠，實力唔算太差，而且佢哋近況當銳，近7場比賽贏6場，球員信心爆棚，食住個勢有力同車路士周旋。卡迪夫城踢法同樣鍾意留前鬥後，近7場攻入18球當中，有12球都係下半場拎到，近6場有5次半場開1球或以下，今仗一於再追1.5球半場細。