歐霸盃：森林省招牌反轉烏德勒支_東方日報

歐霸盃荷英對戰，烏德勒支主場迎戰諾定咸森林；森林實力高幾班，而且近6場贏4場，證明歐洲賽同英超兩條戰線都頂得住，撞正烏德勒支近5場歐霸盃僅得1和4負，戰績完全靠唔住，客勝睇高一線。

（Now 643周五凌晨1時45分直播）文:邪神

森林喺歐洲賽有輝煌歷史，近4次對荷甲球隊錄得3勝，不過對上一次作客荷蘭贏波，要數到1983年10月2比1贏燕豪芬，所以今場如果擊敗烏德勒支，將會係佢哋42年來作客荷蘭首場勝利，對於該隊嚟講意義重大，球員更有爭勝動力。

經過季初亂局，森林自從主帥戴治執教後成績回穩，上月底曾作客大炒利物浦3比0，聯賽逐漸脫離降班區。至於戴治上任以來嘅森林3場歐霸盃，錄得2勝1和未輸過，仲有機會爭直接出線席位，預計今場會積極搶攻，雖然基斯活特仍然養傷，但佢哋前線有卡利穆恩度同赫臣奧杜爾等射手壓陣，應該夠殺。

唔夠班歐霸未開齋
烏德勒支今季歐霸盃聯賽階段仍未獲勝，錄得1和4負入2球失7球，明顯唔夠班，該隊星級前鋒施巴斯坦賀拿，今季上陣19場僅入1球，完全交唔到貨，烏德勒支攻力弱成咁，森林大可以放膽搶攻，客勝放心捧；另外考慮到烏德勒支近5場歐霸盃，4次開2球或以下，2.5球入球細亦可兼顧。