日職：贏波即封王鹿角細不可擋_東方日報

日職周六煞科，經過漫長球季，聯賽冠軍誰屬要鬥到最後一輪才分勝負，究竟係日職最成功球會鹿島鹿角第9度奪冠，定係柏雷素爾等足14年再度封王，到時自有分曉。（無綫myTV SUPER周六下午1時直播）文:邪神

鹿島鹿角對上一次奪冠已經係2016年，佢哋今季由近幾年帶領川崎前鋒取得成功嘅監督鬼木達回巢執教，成績驕人，目前領先次席柏雷素爾1分，掌握爭標主動權。鹿角今季踢法穩中求勝，防守相當硬淨，前線主要靠里奧施亞拉單箭頭爭取入球，近5仗聯賽4次開2球或以下，2.5球入球細值得優先捧場。

柏雷素爾無退路先破町田
次席嘅柏雷素爾對上一次、亦係唯一一次日職奪冠喺2011年，對柏市嚟講，形勢上已無退路，今場贏咗先講，再寄望鹿角失分先有機會後上捧盃。對手町田澤維亞有亞冠盃後顧，今場例行公事難免避重就輕，主勝要得過。