英超：艾美利追擊舊主冇留手 維拉弗到漏受讓秤仙_東方日報

英超焦點大戰，阿士東維拉主場激鬥阿仙奴，第3位維拉愈戰愈勇，各項賽事6連勝，當然要食住個勢，力爭贏埋今場爭標「6分波」。榜首阿仙奴遇上前列勁旅，佔唔到優勢，加上傷兵問題惡化，兼且作客兩連和，實在冇本錢讓波，寧願博阿士東維拉讓球主勝（+1）。（Viu TV 96台、Now 621及611周六晚8時30分直播）文:Mic少

阿士東維拉自9月底開始保持高水平發揮，各項賽事近14場取得12勝2負，如果單計英超，近9仗贏8仗，期間僅作客不敵利物浦，並擊敗曼城。維拉頻頻奏捷，現時落後「一哥」阿仙奴6分，換言之只要今場勝出，就可以拉近至3分距離，對於爭標非常關鍵，肯定搏到盡，尤其係領隊艾美利曾於6年前被「兵工廠」炒魷，每次重遇對方，都增添一份復仇味道。

翻查艾美利執教維拉後，5次鬥「兵工廠」，獲得2勝1和2負，可謂勢均力敵。此外，維拉前鋒奧尼屈堅斯上場對白禮頓，個人梅開二度，打破兩個月入球荒，佢重拾射門鞋，可進一步提升搶分成功機會。

阿仙奴傷兵滿營削弱攻力
另邊廂，阿仙奴備受傷兵問題困擾，繼兩位正選中堅加比爾馬加希斯、威廉沙列巴受傷後，副選中堅基斯甸摩斯基拿、中場迪格蘭賴斯上仗亦傷出，勢必削弱攻守能力。更何況阿仙奴今季聯賽對前列球隊，並冇明顯優勢，包括主場補時驚險逼和曼城，近兩場作客分別同新特蘭、車路士打成平手，恐怕無力擊敗維拉。