英超：惡客車路士轟列爭勝_東方日報

剛賽和阿仙奴嘅車路士，今晚作客鬥列斯聯。排第3嘅「車仔」客場表現出色，近6場聯賽作客獲4勝1和1負，而且近5次對列斯聯錄4勝1負，格食格下可反客為主，客勝有計。 （Now 622周四凌晨4時15分直播）文:邪神

車路士上場惡鬥阿仙奴，未完半場就有摩西斯卡些度領紅牌被逐，但10人應戰之下仍然入波領先，阿仙奴幾經艱苦先追和1比1完場，可見呢部「黃金戰車」戰鬥力有幾厲害，再者佢哋今季作客成績甚佳，6場聯賽作客攻入14球屬英超最多，僅失5球為英超並列第2少，數據相當靚仔，令人放心。

至於人腳方面，雖然車路士仲有唔少傷兵，高爾彭馬未好番，仲有卡些度停賽，但佢哋勝在板凳夠厚，頻密賽程亦唔怕，前線有祖奧柏度、阿歷真度加拿祖、艾斯迪華奧攻堅，防中亦有安達利山度士同列斯占士，呢套陣容今場應該夠殺。

列斯聯遇強冇運行
至於今季重返英超嘅列斯聯，近期狀態欠佳，現時徘徊下游，連面對諾定咸森林、般尼等同級球隊都輸波收場，繼續排喺聯賽尾2，今仗再鬥前列分子車路士，想搶分真係難過登天。