英超：喜鵲地頭振刺高飛_東方日報

周中英超加開快車，周三凌晨好路之選有紐卡素主場迎戰熱刺，「喜鵲」主場表現特佳，主場6連勝，反觀熱刺愈踢愈沉，聯賽及歐聯連番受重創，紐卡素贏面本已甚高，再加上佢哋近4次正式賽事交手全勝，明顯「格食格」更添勝算，主勝屬不二之選。（Now 621及611周三凌晨4時15分直播）文:邪神

紐卡素今季主場及作客成績反差極大，主場連續取勝，但作客就一勝難求，上輪終於破數據，作客愛華頓大勝4比1，不過今次快車賽程同下輪聯賽，將會連續兩場主場出擊，分別對熱刺及般尼，又係佢哋搶分好機會，隨時可以3連勝；前鋒禾達美迪、哈維班尼斯及積及梅菲可以盡情數胡，贏面高唱入雲。

熱刺頹爆士氣曳
熱刺本來係英超作客王，一度保持作客7場不敗走勢，直至英聯盃作客淨吞紐卡素兩蛋，其後聯賽作客阿仙奴慘負1比4，再連隨喺歐聯作客以3比5大敗於巴黎聖日耳門腳下，3場作客狂失10球，防線恍如不設防，佢哋上輪聯賽主場對富咸又輸，士氣低落，今仗再度到訪聖占士公園球場惡鬥紐卡素，落敗屬意料中事。