澳職：獅吼慢攻出細貨_東方日報

今日下午澳職獨腳戲，布里斯班獅吼主場硬撼墨爾本勝利。獅吼主場出擊踢法上特別保守，墨勝今季開壞個頭更加唔敢冒進，而且兩軍碰頭例少交收，捧中位數2.5球入球細係明智之選。

（無綫82台周五下午4時35分直播）

上季常規賽排尾2嘅獅吼，今季知恥近乎勇，開咧頭5輪聯賽取得2勝2和僅1敗，表現唔曳，其中3次主場出擊錄得2勝1和之餘，更全部保持清白之身，防守穩健，可見佢哋喺自己地頭比賽，踢得分外保守，希望做到穩中求勝，相信今仗都採取呢個策略。

桑馬達加盟冇貨交
墨勝今季簽入前曼聯中場桑馬達，諗住攻力升呢，點知出師不利，頭5輪聯賽只得1勝1和3負，入得4粒咁大把，場均1球都冇，其中有3仗食白果，37歲嘅桑馬達只係入得1球兼未曾交出助攻，實在幫唔到手。以之前打吡戰為例，墨勝不但控球佔優，射門多達21次，可惜只得5次中龍，相反對手墨爾本城全場僅得10次射門，已經有6次中龍兼入2粒，睇得出墨勝進攻效率相比同市死敵差天共地，今仗作客都會先求穩陣。

翻查紀錄，雙方近7次聯賽碰頭，有6次開2球或以下，可見獅吼同墨勝每逢交手均小心翼翼，預計今仗都係呢種格局，捧2.5球入球細為妙。