歐霸盃：主場搶韁慣性領先半場 維拉醒神速爆年青人_東方日報

今晚歐霸盃阿士東維拉主場迎擊年青人，英超勁旅維拉愈踢愈上力，各項賽事近11場贏9場，包括主場6連勝，當中有5次上半場領先，踢法非常搶韁；瑞士代表年青人防線脆弱，歐霸盃4戰已勁失10粒，半場都擋唔住主隊強攻，半場主勝1.4倍可用作過關鐵膽。

（Now 643周五凌晨1時45分直播）文:Mic少

維拉季初一度失準，好彩領隊艾美利係有料之人，迅速領軍重回正軌，由9月底開始一直有穩定發揮，近11場錄9勝2負，當中兩場敗仗都係作客，分別歐霸盃不敵伊高斯，及英超輸畀利物浦。維拉喺自己地頭一向屬信心保證，主場已經6連勝，包括以1比0擊敗勁旅曼城，該仗開賽19分鐘就入波，並領先到尾，連續4次開出「主主」，可見只要佢哋先入波，對手就難以扳平。維拉今場仲有好消息，前鋒摩根羅渣士上場英超梅開二度，打破超過1個月入球荒，逐漸重拾狀態，令球隊如虎添翼。

年青人現階段喺歐霸盃4戰2勝2負，所贏對手只係弱隊布加勒斯特星隊及盧多格德斯，對住兩支希臘球隊彭拿典奈高斯同ＰＡＯＫ，分別慘敗1比4及0比4，擺明唔夠班，遇上維拉極可能迅速失守。

串埋羅馬半Ｗ有肉食
另一場歐霸盃羅馬主場對米迪蘭特，意甲榜首羅馬走勢凌厲，各項賽事3連勝兼半場領先，佢哋今場半場主勝有1.77倍，串埋維拉半主，整條過關二串一，穩陣得嚟有肉食。

（Now 638周五凌晨1時45分直播）