英超：喜鵲殘陣曼城不勝無歸_東方日報

英超尾場戲碼紐卡素主場迎戰曼城，今場形勢好簡單，「魔人」艾寧夏蘭特弗到漏油，紐卡素中堅丹般恩停賽，冇埋呢件大隻佬頂住夏蘭特，曼城客W絕對抵玩到極。

（Now 621及611周日凌晨1時30分直播）文:渡邊年

紐卡素接連於聯賽輸波，近4場英超只得1勝3負，現時已經跌到落下半版，今場仲要有多名主力缺陣，前線有安東尼哥頓、後防丹般恩同正選門將尼克普比都有傷，防線兩大定海神針都冇晒。

艾迪侯域怕咗藍月亮
提供多一個數據畀大家，連同之前執教般尼茅夫，「喜鵲」領隊艾迪侯域於英超18次帶隊鬥曼城，只得2和16負，你話今場紐卡素點捧得落手？

曼城喺國際賽前表現大勇，各項賽事8戰7勝，夏蘭特勇態持續，由8月底開始，包括國際賽在內，18次有份上陣嘅賽事，有17場可以取得入球，今場「魔人」肯定可以士哥助「藍月亮」反客為主，捧客勝之餘，夏蘭特「任何時間入球」熱都要捧。