外圍賽：迪比着火士哥停不了 荷蘭當弗贏波冇難度_東方日報

先講波蘭現時情況，波蘭一向都係隊長羅拔利雲度夫斯基嘅「1人球隊」，不過球隊喺今屆賽事期間曾經出現將帥不和，原主帥普比斯竟然褫奪「羅拔佬」隊長臂章，繼而觸發「兵變」，「羅拔佬」仲放狠話：「有普比斯冇我」，卒之普比斯喺今年7月下台，改由烏爾班接手。文:邪神

羅拔佬權力過大影響波蘭
雖然換帥後波蘭4戰錄得3勝1和，成績有改善，但「羅拔佬」權力大過主帥絕非好事，球隊贏波當然冇問題，不過當要打逆境波嗰陣，問題就會爆發。

反觀被譽為世盃「無冕之王」嘅荷蘭，球隊內部就相當團結，「風車國」主帥朗奴高文今次點兵盡起精銳，務求一擊必殺。

以54球成為荷蘭隊史射手王嘅31歲前鋒迪比，早前又以35個助攻超越洛賓成為隊史助攻王，雖然迪比實力始終未獲大眾普遍認同，但喺朗奴高文嘅三箭頭體系當中，擔任正中鋒嘅迪比可謂交足貨，迪比嘅好表現，正正就係荷蘭整體踢法嘅最佳憑證。今場「羅拔佬」有冇波入好難講，但根據近期數據，迪比有入波或助攻嘅機會非常高，客勝要捧場。