英超：喜鵲格食格反轉賓福特_東方日報

英超頭場之一，賓福特主場迎戰紐卡素。雖然賓福特主場硬淨，但「喜鵲」近況弗爆，而且近年交手食住賓福特，今仗有力反客為主，讓平半可取上盤。（Now 621周日晚10時直播）文:法達斯維

近８對賽紐卡素７勝
賓福特仍然係列強眼中嘅豬頭骨，尤其係主場出擊特別醒神，今季贏過曼聯同利物浦，對住曼城都係僅輸1粒，絕對唔易啃。不過「蜜蜂仔」防守麻麻，各項賽事近10仗只有兩場保持清白之身，單計聯賽10輪就失咗16粒，但入得14球，攻守唔多平衡，上場倫敦打吡對水晶宮淨吞兩蛋，其中1球更係中堅彌敦哥連斯嘅「老烏」，防守都幾牙煙。

另邊廂，紐卡素雖然喺聯賽比「蜜蜂仔」少1分，但各項賽事近8仗取得6勝2負，講氣勢絕不輸蝕，而且上仗聯賽領先之下突然跌Watt，畀韋斯咸反勝3比1，吸取教訓後今仗唔敢再輕敵。其中兩名德國新兵愈戰愈勇，「2米美斯」禾達美迪於前線嘅支點作用，幫到隊友後上埋門，中堅馬歷泰奧唔單止被選為球隊上月最佳球員，更事隔兩年獲「日耳曼兵團」重召，加上近8次對住賓福特，「喜鵲」贏咗7次，上盤撐得過。