沙特職：艾費哈地頭贏多鋪_東方日報

史摩寧撐起鋼鐵防線
沙特職今晚有另一場免費直播賽事，艾費哈主場迎戰艾科多。兩隊目前都排喺中下游位置，今場志切搶分，激戰可期。艾費哈主場一向硬淨，基斯史摩寧率領嘅鋼鐵防線夠穩陣，球隊傷兵問題已解決，今場可以「夫添」全力搶攻，加上佢哋近年對戰都食住「私房菜」艾科多，有信心可以全取3分，主勝放心捧場。

（on.cc東網周五晚9時20分直播）文:工廠仔

艾費哈雖然唔算係沙特豪門，但陣中都有唔少好波之人，包括前曼聯中堅基斯史摩寧、委內瑞拉國腳米基爾維蘭路華等防守悍將，佢哋開季頭6場只曾1敗，雖然近期連輸兩場，不過上仗對榜首艾納斯，奮戰至補時最後一刻先至冇運輸波，整體演出其實唔曳。

同時，艾費哈目前已經冇任何傷兵問題，可以全員候命，由基斯史摩寧同米基爾維蘭路華一對中堅組合組成鋼鐵防線，令球隊防守大有保證，射手薩卡拉可以專心數胡，今仗喺主場面對火力疲弱嘅艾科多，絕對係游刃有餘。

艾科多火力疲弱往績曳
另邊廂，艾科多上場2比1險勝今季全敗嘅「魚腩」艾拿積馬，終於成功打開今季勝利之門，但球隊鋒力疲弱問題仍未解決，贏艾拿積馬之前6場只係入得3球，搞到深陷降班漩渦。艾科多今季3場聯賽作客只得1和2負，而且對住艾費哈嘅往績極差，兩軍近4次交手，都係由艾費哈贏波，捧主勝係最佳選擇。