亞冠：町田迎墨城半和好路_東方日報

亞冠精英盃第4輪今午展開，頭場先睇A組日澳對決，町田澤維亞對墨爾本城，町田澤維亞日職爭標已告失敗，今季餘下時間將會專注盃賽，佢哋踢法穩陣，而且近期防守表現甚佳，近3場均保持不失球，近6場5次開半場和，遇着作客踢穩陣波嘅墨爾本城，今場開半場和機會高唱入雲。（HOY TV 76台周二下午6時直播）文:邪神

町田澤維亞近年異軍突起，陣中坐擁門將谷晃生，後衞中山雄太，中場相馬勇紀、望月海輝及前鋒西村拓真等5大國腳，實力強勁，不過日職競爭實在太激烈，町田喺聯賽只能排第6，尚餘3輪落後榜首鹿島鹿角10分，已經喪失爭冠機會，只能寄情亞冠賽場，同埋稍後舉行嘅日皇盃4強對FC東京。

墨城踢亞冠較保守
町田踢法特點係穩中求勝，近6場5次開半場和，半場波膽全部為0比0，至於亞冠表現，頭3輪錄得1勝2和，表現不過不失，預計今場係坐和望贏格局，尤其上半場未必有交收。

墨爾本城上輪澳職0比0賽和布里斯班獅吼，聯賽開季3場1勝2和僅失1球，防守同樣硬淨；再者，墨爾本城喺亞冠賽場上就更加保守，近3場亞冠全開半場和，半場比數都係0比0，所以今場捧半場和之餘，建議直取半場波膽0比0，半場45分鐘好快過，等一陣就收錢。