英超：重返勝軌Vs4連敗頹勢 維拉突擊撞散利物浦_東方日報

近期成績跌落谷底嘅利物浦，今輪主場迎戰阿士東維拉，力圖終止聯賽4連敗頹勢。利物浦今場縱有主場之利，但球隊喺戰術、排陣、防守上問題多多，難望短時間內完全解決，今場面對經已全面回勇嘅維拉，絕無贏波把握，捧維拉讓球客勝（+1）好路。

（Now 621及611周日凌晨4時直播）文:臻贏特

利物浦陣容星光熠熠，不過新舊球員融合出現頗大問題，德國進攻中場域斯仲未搵到合適位置，今季英超仍然係0入球、0助攻；新簽兩閘謝利美費林邦同米路斯卻基斯，前者踢法唔啱戰術已失正選，後者獲重用卻成最大漏洞，近4場聯賽失9球嘅防守畀唔到人信心。

紅軍最怕防反球隊
「紅軍」領隊施洛今季改用傳控踢法，面對穩守突擊球隊極為輸蝕，施洛亦承認未有方法應付對手採用低位防守加長傳急攻戰術，而維拉正正係英超反擊力最強球隊之一，摩根羅渣士、奧尼屈堅斯等都能用體能同速度爆破，利物浦後防岌岌可危。

阿士東維拉開季成績差勁，不過近期已全面復甦，聯賽4連勝重返正軌，包括作客擊敗熱刺以及上場1比0挫曼城，穩守突擊踢法對住同級同頂級對手特別奏效。維拉近5次對利物浦有3次保持不敗，今仗有信心搶分，讓球客勝（+1）值得支持。