沙特職：追分撲擊戰 希拉爾弗爆半W搏甩比_東方日報

今晚沙特職直播戲碼，希拉爾主場迎戰艾沙比。希拉爾近期贏到開巷，弗到勒唔住，加上有亞冠精英盃後顧，今仗撞正實力平庸嘅艾沙比，勢必先發制人，半場主勝捧得過。

（on.cc東網周五晚10時50分直播）文:法達斯維

希拉爾今夏有前國米主帥施蒙尼恩沙基入主，佢一上任就要即刻帶隊打世冠盃，唔單止喺分組賽打和皇馬，仲喺16強淘汰曼城，最終8強止步，絕對係超額完成。由於要踢世冠盃，抖暑時間少咗，但話咁快又要開咧，明顯唔夠時間操起，導致季初成績唔好，好彩本身底子好，有達雲紐尼斯、魯賓尼維斯、迪奧靴南迪斯等球星助陣，近期開始發力，各項賽事連贏7場，唔講得笑。

留力亞冠盃速戰速決
單計聯賽，希拉爾近4仗亦獲3勝1和，而呢4仗全部半場領先，非常搶韁，依家只係落後全勝嘅榜首艾納斯4分，唔係冇得追。當然要考慮到，佢哋下周中要出戰亞冠精英盃造訪艾加拉法，今仗都要適當嘅留放，既然佢哋習慣搶開局，早啲入波鎖定勝局，就可以讓主力早啲休息。

另邊廂，位列聯賽中下游嘅艾沙比，不但實力遠遜希拉爾，狀態亦欠佳，佢哋近4仗聯賽只得3和1負未贏過，加上近5次對住希拉爾，艾沙比4度落敗，今仗隨時半場都頂唔住，一於揀半場主勝。