澳職：墨城射手撻着客破獅吼_東方日報

周五澳職賽事，布里斯班獅吼主場鬥墨爾本城。獅吼今季表現大有提升，但球隊正處轉型期，挑戰上季總冠軍、實力強橫嘅墨城時間尚早，特別係客隊前鋒卡普托今季大爆發，墨爾本城各方面都秤高一線，今場放心捧客勝。

（無綫82台周五下午4時35分直播）文:工廠仔

墨爾本城開季表現突出，喺聯賽1勝1和排榜首，踢亞冠精英盃亦旗開得勝，狀態同士氣都處於高峰，尤其是20歲射手卡普托近期紅透半邊天，佢今季3場賽事攻入4球，成為澳職史上第5年輕累積10個聯賽入球球員，墨城火力極有保證。

主隊改踢法磨合需時
相反，上季常規賽排尾2嘅布里斯班獅吼，今季喺華簡尼斯執教下，嘗試由體力化踢法改為技術性組織，不過球員明顯未完全熟練，上場對威靈頓鳳凰就「贏掌聲輸波」。何況華簡尼斯教練生涯啟蒙老師，正正係墨爾本城主帥維迪馬，今場對決難免被睇低，而且兩隊近3次交鋒，墨城都順利贏波，今場一於捧客勝。