沙王盃：艾卡迪沙搶韁半W有信森_東方日報

沙王盃16強賽事，艾卡迪沙主場迎戰艾哈森。艾卡迪沙貴為沙特新興勢力，過去1年大展拳腳，簽入多位戰鬥力強橫嘅球星，乘住開季強勢，主場必主動撲擊艾哈森，半場主勝放心捧場。（on.cc東網周二晚10時35分直播）文:工廠仔

艾卡迪沙喺90年代曾經風光，之後降班沉淪一段時間，上季再戰沙特職就大展拳腳，球隊依家有意大利前鋒列迪古、德國中場祖利安韋高、葡萄牙翼鋒奧達維奧艾美臣、西班牙中堅拿祖費南迪斯等猛將，聯賽開季6戰4勝2和不敗，矢志捧盃嘅艾卡迪沙，今次沙王盃就係佢哋挑戰冠軍嘅機會。而且球隊喺西班牙教練米高帶領下，踢法甚為進取，近7場比賽就有5場都喺上半場領先，預計今場一開波就會搶攻。

艾哈森鋒線冇料到
相反，艾哈森開季6場聯賽只得1勝，最大問題係鋒力疲弱，近6場賽事有4場「食白果」，今場對住艾卡迪沙只能主守「等輸」，佢哋上場對艾納斯就喺上、下半場各失1球輸0比2，今場撐艾卡迪沙可以提早收工，半場主勝穩開。