女歐聯：狀態火熱勒唔住 里昂格食格秤仙_東方日報

新一屆女子歐聯正式展開！今屆賽事跟隨男足改踢「瑞士輪」聯賽，有更多重量級戲碼上演，首輪就有衞冕嘅阿仙奴女足，主場迎戰法國勁旅里昂女足。阿仙奴女足開季演出麻麻，上場輸畀曼城女足顯示防守漏洞，對住火力極強嘅里昂女足未必頂得住，不妨直取客勝。（Now 643周三凌晨3時直播）

阿仙奴女足上屆勇奪歐聯冠軍，不過今季開局唔太順利，近3場比賽2和1負，包括日前作客2比3輸畀曼城女足，今季5場比賽只得1場可以保持不失。事實上，開季表現慢熱係阿仙奴女足「舊病」，上季佢哋首場歐聯分組賽，就以2比5輸畀拜仁慕尼黑女足。

阿仙奴慢熱主場都難靠
今場係上屆女子歐聯4強翻版，當時阿仙奴女足喺主場先輸1比2，到作客先至絕地翻身。翻查阿仙奴女足近3次主場對里昂女足，竟然全部輸晒，有「格食格」味道，今仗再戰里昂女足，心理上先輸一截。

星光熠熠嘅里昂女足開季狀態極勇，上場聯賽作客8比1狂勝朗斯女足，對住同樣有份踢歐聯嘅巴黎聖日耳門女足亦大炒6比1，今季聯賽4戰全勝，4場加埋合共轟入19球，入球能力相當驚人。今場對住防守麻麻嘅阿仙奴女足，加上過往作客倫敦成績理想，今場有信心再開客W。