英聯盃：曼城爭盃仔半W起菲_東方日報

曾經喺2018至2021年4奪英格蘭聯賽盃嘅曼城，今季第3圈將會作客哈特斯菲爾德。曼城上季「四大皆空」，今季主帥哥迪奧拿可能要向難度較低嘅英聯盃發圍，攞番個「保溫盃」，今場遇着英甲仔相信可以輕鬆取勝，半場客勝可以作為過關變倍器。

（無綫myTV SUPER周四凌晨2時45分直播）文:渡邊年

對哈特斯菲爾德例搶韁
隨住英超同歐聯爭霸難度愈嚟愈高，英聯盃已成為列強兵家必爭之地，曼城之前唔多睇重，但上季除咗社區盾外「四大皆空」，哥帥都不得不認清事實，早啲攞番個盃仔落袋最重要。以往「藍月亮」喺英聯盃初段肯定會作出輪換，只會派一兩個正選球員上陣，不過依家爭持激烈，預料即使進行輪換，都會派一定數量嘅正選出戰，實力肯定喺哈特斯菲爾德之上。

哈特斯菲爾德上圈遇上另一英超球隊新特蘭，結果90分鐘打成1比1，最終射贏12碼晉級。不過曼城實力比新特蘭強，而且雙方近3次交手，「藍月亮」全勝之餘，更早於半場領先哈特斯菲爾德，相信今仗半場客勝可以輕鬆開出。