英超：維拉撻着搶W拆紐_東方日報

英超今晚早場，阿士東維拉對紐卡素免費陪大家送飯。維拉今夏雖有主力流失問題，好在有主帥艾美利撐住，熱身賽所見整體戰鬥力仲保持到；反觀「喜鵲」，不但今夏增兵被瘋狂截胡，仲出現主力扭計轉會鬧劇，熱身賽踢到一塌糊塗，對住準備充足嘅維拉想唔輸都難，睇好維拉主場旗開得勝。

（ViuTV 96台及Now 621周六晚7時30分直播）文:邪神

維拉上季表現出色，聯賽同歐聯兩條戰線都交出好表現，可惜歐聯8強被最終奪冠嘅巴黎聖日耳門淘汰後，成隊波有啲洩氣，聯賽連場失分，煞科日輸畀曼聯後慘失歐聯席位，加上維拉近年過度擴張，令球隊財政壓力大增，影響到今夏組軍工作。

伊沙克嗌走打亂喜鵲
雖然面對主力流失問題，拉舒福特同馬高阿辛斯奧離隊，幸好維拉士氣未受太大影響，喺艾美利領導下，季前集訓準備充足，球員操起狀態迎接新球季，熱身賽試過大炒羅馬4蛋，英超開鑼前最後一場熱身賽，亦以2比0淨勝維拉利爾，新球季首仗主場出擊，有力敲響勝鼓。

相反，紐卡素今夏增兵處處受阻，幾乎所有心儀球員都被競爭對手截胡，主帥艾迪侯域大失預算，加上受到主力射手阿歷山大伊沙克離隊風波影響，嚴重打擊士氣，季前6場熱身賽2和4負未贏過，包括對韓職選手隊輸0比1，再者佢哋近年作客維拉輸多贏少，近6次聯賽作客維拉僅得1勝5負，今場再輸不足為奇。