女歐國：挪威贏氣勢平手盤有計_東方日報

女子歐國盃8強展開，挪威女足率先迎戰意大利女足，「女維京人」今屆展現冠軍相，分組賽3戰全勝，最重要係上場喺提早穩奪首名出線權情況下，輪換陣容畀部分主力休息，可以養精蓄銳出擊，體力有優勢。反觀「意女」驚險出線，整體實力唔及對手，挪威女足以逸待勞，平手盤比較值博。（HOY TV 76台周四凌晨3時直播）文:Mic少

挪威女足本身實力秤先之外，運氣亦相當不俗，抽到好籤，同組對手比較弱，首兩場分組賽連贏瑞士及芬蘭後，提早一輪獲得小組首名晉級8強。因此「女維京人」上場對冰島女足，恩格安珍、卡露蓮漢臣、古籮萊頓及隊長希嘉寶等多位主力獲得充分休息，留力踢淘汰賽，不過佢哋喺輪換之下，仍然贏冰島女足4比3，可見副選球員亦具備上乘質素。挪威女足「叉足電」，今仗以最佳陣容出擊，勝算更加大。

意大利激戰完未回氣
另邊廂，意大利女足演出就顯得力有不逮，首仗小勝比利時女足1比0之後，第2場對同組最弱嘅葡萄牙女足，竟然被逼和1比1，上場遇上半力出擊嘅勁旅西班牙女足，立即輸1比3，如果唔係比利時「幫手」擊敗葡萄牙，「意女」能否出線亦成為疑問。值得留意，意大利上仗激戰西班牙，體力消耗甚大，加上比挪威女足少1日時間休息，體力更加輸蝕，一旦落後，恐怕無力收復失地，挪威女足平手盤值得捧場。