黃興桂：波圖巴素利「狗咬狗」少交收

本周上演4場歐聯16強次回合，先講今晚嗰兩場，由於皇馬領先緊史浩克04兩粒，晉級應該冇乜懸念，另一場波圖主場硬撼巴素利，Peter認為係dog eat dog，即係狗咬狗骨，唔易分出勝負，由於實力不相伯仲，兩軍會小心翼翼，先打好防守再搵入波機會，預計今仗入球會偏低。明晚兩場先至係真正嘅大戰，拜仁慕尼黑返主場迎戰薩克達，呢支德甲班霸人強馬壯，相信可恃質贏波過關。

車仔冇後顧聽晚搏殺
至於車路士主場火併聖日耳門，早前Peter已經講過，車仔想一季之內擸4個冠軍邊有咁易呀？因此主帥莫連奴寧願喺足總盃輸畀弱隊出局，令車仔於兩回合前都獲得休息，正係莫連奴同教練團呢班「軍師」賽前度好晒嘅橋，不過成敗亦好在乎場上「士兵」嘅發揮。

依家車仔先袋咗英格蘭聯賽盃，聯賽又甩開次席曼城5分兼打少場，應該冇走雞，季尾可以集中火力衝擊歐聯，老闆阿布拉莫域請莫帥回巢，最大目標都係歐聯冠軍，況且陣中冇乜傷兵，只要球員發揮正常，車仔晉級機會高唱入雲。

金句：莫帥計劃戰略早度掂，車仔成敗還需靠球員