Mic少：國米搶韁唔赦拿玻里

莫路伊卡迪向希古恩示威
意甲拿玻里主場對國際米蘭，雙方阿根廷射手明爭暗鬥，搶國家隊位置。國米前鋒莫路伊卡迪今季大熟大勇，已取得14個聯賽入球，多過拿玻里首席射手希古恩，但偏偏不獲阿根廷主帥馬天奴垂青，反而希古恩卻屬於國家隊鐵膽。莫路伊卡迪今仗就要以行動，向馬天奴證明自己比希古恩優秀。國米受讓，要讓球客勝。

（TVB301周一凌晨3時45分直播）

誓搶國家隊位置
22歲嘅莫路伊卡迪出身巴塞青訓系統，曾經有「新美斯」之稱，上季由森多利亞加盟國米，迅速成為主將，今季演出更佳，以14個入球，位居射手榜次席，僅比泰維斯少1球。莫路伊卡迪一直渴望為阿根廷披甲，甚至拒絕意大利國家隊邀請。但佢至今只曾為阿國上陣1次，而且已經係兩年前嘅事。馬天奴成為阿根廷主帥後，對莫路伊卡迪視而不見，令佢忿忿不平，要奪取意甲神射手寶座，打動馬天奴。

拿玻里體力輸蝕
至於希古恩成名較早，加上効力過皇馬，名牌效應下，即使表現平平，仍然可以穩佔國家隊位置。希古恩近期狀態麻麻，近5場聯賽都冇波入，完全被莫路伊卡迪比下去。另外，拿玻里三線作戰，剛於上周中意大利盃同拉素激戰，體力比較輸蝕，讓波制唔過。