SAMVO肥叔：AC行衰運反多鋪

新年流流最緊要好意頭，但求順風順水，切忌博啲運勢轉沉嘅球隊反彈，尤其係好似意甲AC米蘭呢類沒落豪門，因為名牌效應，每次主場出戰名氣次一級嘅球隊，通常讓到過晒火位，上周肥叔先貼中佢哋對家安玻里下盤，之後日日都傳出恩沙基帥位難保嘅消息，試問軍心點會穩呀？今晚意甲「紅黑兵團」又喺自己地頭出擊，對住排尾二嘅切塞納，牌面梗係AC贏晒喇，但佢哋要讓到球半兼高水，明顯熱唔透，切塞納上仗力戰逼和一哥祖雲達斯令士氣大振，為護級勢必豁出去，既然AC低處未算低不妨反多鋪。

（TVB 302周日晚10時直播）

畢爾包多線發展搏殘晒
另一支要反嘅球隊係西甲畢爾包，「巴斯克雄獅」自從今屆參加歐聯後凸顯板櫈深度不足，搞到兩頭唔到岸，雖然歐聯已經出局，但轉戰歐霸一樣咁損耗兵力，加上西班牙盃殺入4強，三線作戰可謂疲於奔命，聯賽只多尾四艾爾切一分，逐漸被捲入護級漩渦，嚟緊周中又要打歐霸32強次回合對拖連奴，仲未諗掂點樣取捨猶如不自量力，今晚西甲主場對華歷簡奴讓唔起半球，一於捧下盤。

至於近期當旺嘅球隊，當然要數德甲二哥禾夫斯堡，上半季踢到冇晒影嘅前鋒巴斯杜斯，歇冬後突然開竅，近五戰怒轟九粒，證明依家班波行緊大運，有時踢波順起上嚟好難用常理去解釋，今晚於德甲主場對住哈化柏林，寧買當頭起唔好拗頸，就算讓到球半都冇有怕，照樣要撐上盤。