英超：車仔神經刀遇拖肥做大騷_東方日報

今晚英超獨腳戲，車路士主場鬥愛華頓。車仔今季表現極度飄忽，小將往往踢嚟患得患失，唔識控制節奏，搞到經常大開大合；「拖肥糖」為搶分護級冇得縮，2.5球入球大咪錯過。（Now 621周二凌晨3時直播）

車仔係今季英超神經刀，既可以砌低曼聯、紐卡素同熱刺，打和阿仙奴同曼城等勁旅，但又會失分畀錫菲聯同般尼呢啲護級球隊，首循環造訪今仗對手愛華頓，就淨吞兩蛋。除傷兵滿營外，車仔陣容實在太年輕，欠缺老將帶領下，經驗不足問題當堂浮現，今季比賽經常大手交易，單計近7場就全開3球或以上。

愛華頓為護級唔會縮
愛華頓今季可謂畀賽會玩謝，因觸犯盈利和可持續發展規則，季初被重罰扣10分，後來上訴得直獲發還4分，之後又因犯另一規則再扣2分，總計被扣8分，依家排緊第16位，只領先尾3嘅盧頓2分，仲要為護級而努力。既然畀人咁玩法，惟有靠自己爭氣，射手卡維特利雲近兩場聯賽都入波，帶領球隊獲1勝1和，造訪後防騰騰震嘅車仔，隨時合演入球騷。