歐國盃：生死一戰波蘭立威_東方日報

歐國盃外圍賽附加賽A組決賽，威爾斯主場惡鬥波蘭，爭取歐國盃決賽周席位，雙方戰意都不用懷疑，不過以波論波，波蘭整體實力比「紅龍」高，雙方近6次交手，波蘭錄得全勝，加上有球隊首席射手羅拔利雲度夫斯基坐陣，今場有望反客為主，平手盤強捧波蘭。（周三凌晨3時45分開賽）

威爾斯2022年卡塔爾世盃踢過附加賽，先後淘汰奧地利及烏克蘭，好聽嘅就係有晒經驗，唔好聽就係渣。順帶一提，根據舊年12月決賽周抽籤結果，今場勝方將會被編入決賽周D組，到時會同荷蘭、奧地利及法國爭出線。

威爾斯6次對碰輸晒
威爾斯力爭連續3屆出席歐國盃決賽周，準決賽4比1大勝芬蘭，今仗主場應戰理應有利，可惜偏偏預上剋星波蘭，「紅龍」近6次對波蘭輸晒，包括2022年歐國聯兩次碰頭，作客輸1比2同主場輸0比1，擺明格食格。

波蘭喺準決賽同樣大勝對手，主場以5比1大炒愛沙尼亞。波蘭近年喺羅拔利雲度夫斯基彈起後，已經連續4個大賽殺入決賽周，如果只計歐國盃，佢哋由2008年開始從未缺席，國家隊入波最多嘅「羅拔佬」已經35歲，佢要力爭連續第4次出席歐國盃決賽周，亦好大可能係佢職業生涯最後一次，肯定會搏晒老命，平手盤絕對捧得過。