Combo King ：普巴弗爆祖記強襲帕爾馬

周中盃賽大衝刺，意大利盃8強帕爾馬主場對祖雲達斯，阿King向祖記讓球客勝投下信心一票，呢支意甲榜首勁旅又孕育出一位法國球王，就係保羅普巴。呢位21歲中場攻守兼備，更連續4場入波，逐步走上前輩柏天尼同施丹「成王之路」，意甲榜尾帕爾馬遇上佢，恐怕只能俯首稱臣。

（now 633周四凌晨3時45分直播）

保羅普巴今季着晒火，聯賽轟入6球，陣中僅次於泰維斯，意盃、歐聯都有進帳，並經常入世界波，功架十足。呢位法國新星腳法細膩之餘，身體亦非常強壯，比兩位法國名宿柏天尼及施丹更全能，難怪皇馬都吼實佢。據悉保羅普巴身價已升至1億歐元，相信最有機會刷新轉會費紀錄嘅球員將會係佢。保羅普巴如日方中，仲有排威。帕爾馬淪為意甲包尾大幡，首要工作係護級，無力兼顧盃賽，同埋佢哋今季曾吞祖記7蛋，輸到心慌。陣中首席球星卡斯辛奴控告會方拖欠佢半年人工，昨日雙方宣布解約，冇咗呢位射手，更加冇還擊之力。

波圖超班「科大」等劏
葡聯盃兩支名牌分途出擊，D組波圖只要主場贏科英布拉大學，就可以取得出線資格，雙方實力懸殊，波圖上月先至作客炒對手3蛋，今仗有埋地利，可望再大勝。C組士砵亭同樣贏波即出線，以其主場5連勝強勢，贏塞圖巴爾兩球屬最低消費。