阿仙奴讓和「白」手興家

阿仙奴讓和「白」手興家 
  
星期日晚英足盃第4圈焦點，肯定落喺英冠白禮頓主場迎戰阿仙奴比賽身上。白禮頓自從換帥後成績穩步上揚，問題係佢哋級數始終同阿仙奴有距離，憑鬥志預期最多輸少啲出局，「讓和」值博。（周日18，now621及633台周一12:00am直播）

阿仙奴近8場波贏咗6場，代表作自然係上場英超作客以2:0擊敗曼城。不過咁，兵工廠今晚未必會派出對藍月亮相同陣容應戰，事關球隊仍要喺聯賽爭上前四，預計雲格今晚會收起部份主力，基奧特、阿歷斯山齊士同辛迪卡索拉等近排用得頗多球員，相信會先列後備，而迪保治同阿歷士張伯倫，亦因為受傷關係肯定會缺陣。

路斯基擔正可信賴

好在，領隊雲格今晚可用之人仍然頗多，奧斯爾、禾確特、路斯基以及祖爾甘保近排其實都係坐多過踢，但奧斯爾質素根本唔使懷疑，而路斯基近期每次出場，都俾人老將重生感覺，威脅力甚至比艾朗藍斯、阿歷士張伯倫等更大，今晚呢位捷克老將可望擔正，自然係白禮頓防線心腹大患。
主隊白禮頓打稿時喺英冠排第19位，球隊季初失分連連，最終教頭希比亞都帥位不保被炒收場；好彩初步睇落佢哋之後冇搵錯人，事關新帥侯頓上任後，白禮頓成績確有改善，近5戰攞到4勝佳績，當中包括上場贏到前列球隊葉士域治3:2，球員信心肯定有所增強。

白禮頓三主力缺陣

問題係，白禮頓對葉士域治都失兩粒，證明防線唔算得上好穩陣，加埋陣容上馬卡爾史密夫、科士打卡斯基同夏福特等主力都有傷唔踢，相信白禮頓只可憑主場之利同極佳鬥志同兵工廠周旋，小敗出局在所難免，「讓和」有分頭值博。