Yennie :足總盃喜遇英冠仔 紅軍球王玩殘保頓

利物浦今季經歷一段低潮期，加埋謝拉特宣布季尾離隊轉戰美職，搞到唔少利迷都喊晒口！好在成班「紅軍」手足為幫「神奇隊長」一圓「捧盃夢」，場場波都去到盡，最近連續9場未輸過之餘，「紅軍球王」史達寧仲弗到冇朋友，今晚喺足總盃第4圈遇上「英冠仔」保頓，梗係要捧1.7倍「讓球主勝」啦！

「紅軍」最近表現脫胎換骨，上仗聯賽盃一度壓住車路士嚟攻添，近排着晒火嘅史達寧換邊後爆Seed，衝破「藍戰士」嘅4人防線射入靚波，喺4強首回合逼和對手，呢件後生仔速度腳法都咁堅，最重要係佢鬥心爆棚，帶動到成班波，計吓計吓，利物浦家陣已經9戰不敗，全軍上下肯定士氣如虹。

9戰不敗4猛將復操 謝四趁機休息
講真，英超冠軍利物浦9成9冇行喇，反而盃賽仲有價講，為咗幫謝拉特離隊前捧盃，今晚對住保頓都肯定唔會輕敵。雖然史杜列治未落得場，謝拉特又會抖一抖留力聯賽盃再撼車仔，好彩守將洛夫雲、格連莊臣、中場祖阿倫同前鋒巴洛迪利都已經悉數復操，前中後三線都大把兵畀羅渣士調配，使乜赦「英冠仔」呀？

冇錯，保頓近8場比賽只係輸過1鋪，但咪忘記佢哋嘅對手只係英冠球隊，領隊連儂又話，今仗會由古莊臣夥拍倒戈嘅希斯基合組雙箭頭，10年前佢兩個就勁，家陣佢哋加埋都73歲，唔係諗住威脅到「紅軍」防線呀？而且保頓作客成績麻麻，近2場客戰就失咗3球，條防線咁曳，點擋得住史達寧呀？

盤路解碼
利物浦今季41戰24次開出入球大，比率達59%。

Data King：紅軍對賽「大」晒
?雙方近11次交手，利物浦取得10勝1負。

?利物浦對上17次出戰足總盃，得2次保清白身。

?紅軍近6次主場鬥保頓開5口入球大。