Mic少：失意豪門今晚乾盃

唔想四大皆空咁失威
國米主勝有信森
歐洲豪門失意聯賽，轉戰盃賽爭發圍！熱刺、國際米蘭、波圖，甚至富貴球會巴黎聖日耳門（PSG），都喺今季本土聯賽演出未如理想，爭標前路舉步維艱。堂堂大球會當然唔可以冇盃捧咁失威，呢幾支球隊為免收爐時四大皆空，今鋪都要跪地餵豬乸，就算盃仔都唔可以放過，今晚一齊出招搏命，嚟個乾「盃」大作戰！

意大利盃16強，國際米蘭主場對森多利亞，焦點肯定係國米教練文仙尼，一來森多利亞係佢成名球會，今仗倒戈百般滋味在心頭。二來文仙尼係「盃賽專家」，教練生涯所教過5支球隊，全部都贏得盃賽冠軍，天生有「捧盃命」，唔到你唔服，今晚一於跟文帥搵食，要國際米蘭主勝。

（now 633周四凌晨4時直播）

文仙尼球員時代曾効力森多利亞15年，佢對森多好有感情。不過依家各為其主，私人感情放埋一邊。事實上文帥冇時間懷緬過去，因為佢重掌國米帥印後，成績仍然冇起色，開始有壓力，轉戰意盃正係佢發揮「盃賽命」嘅好機會，力爭贏波挽救民望。

文仙尼天生捧盃命
文仙尼以往執教費倫天拿、拉素及國米都贏過意盃，即使出外搵食亦帶領曼城捧足總盃，為加拉塔沙雷贏土耳其盃，名副其實嘅「盃賽專家」。由於國米喺意甲爭標無望，甚至連打入前3位出戰下屆歐聯嘅機會都唔大，文仙尼幾大都要攞番個意盃保住命仔。

森多利亞早前出售首席射手加比亞甸尼畀拿玻里，猶如自斷一臂。另外教練米赫洛域曾喺國米做文仙尼副手，可謂徒弟挑戰師傅，佢有乜板斧相信逃唔過文仙尼雙眼。兩隊近6次對賽國米獲得5勝1和，點計都佔上風。