Mic少 ：酒店制水缺電冇床位 剛果嗌晒救命捧對家

非洲國家盃今晚開波，揭幕戰由A組主辦國赤道畿內亞對剛果，呢項賽事原本由摩洛哥舉行，但因為伊波拉疫症而棄辦，兩個月前由赤道畿內亞臨時臨急接手主辦，好多配套設施未完善；剛果領隊利萊批評當地居住環境惡劣，連自來水都冇，球員苦不堪言，難免影響比賽情緒。赤道畿內亞佔盡「地利優勢」，小讓平半，上盤值得一試。

（周日凌晨零時開賽）

利萊賽前大吐苦水話酒店床位唔夠，有七位職球員冇床瞓，而且酒店電力亦不足，甚至想洗手都冇自來水，令到一班球員躁爆。剛果多位球員喺法國等歐洲聯賽搵食，佢哋平時好食好住，今次由天堂跌落地獄仲邊有心機踢，話唔定想早啲出局早走早着。

赤道畿內亞冇壓力受讓筍
赤道畿內亞本來因外圍賽用違規球員而被取消資格，但因接手主辦賽事得以參加決賽周，令人聯想起92年歐國盃，丹麥以後補身份參賽奪得冠軍。赤道畿內亞今次突然有得踢已經賺咗，球員冇壓力下比賽，可能有更佳發揮。

同組布基納法索對加蓬，布軍係上屆亞軍，陣中有唔少球員喺歐洲頂級聯賽搵食，包括里昂後衞巴卡尼干尼、艾美利亞中場莊拿芬辛迪，平手盤可秤先。

（周日凌晨3時開賽）