修咸頓發茅搶分佔先機|東方日報

今晚英超爆發護級生死戰，榜尾修咸頓主場惡鬥般尼茅夫，今場屬護級「6分波」，修咸頓上場踢和阿仙奴打起士氣，佢哋今仗必須贏波保住一線生機；「般茅」防線欠穩，而且佢哋近期經常早段失魂，近6仗有5次先失波，今仗捧修咸頓第一隊入球，相信好快收錢。
（Now 623周五凌晨2時45分直播）

般茅早段經常失魂
修咸頓為護級救亡已經出盡法寶，季內兩度換帥，看守領隊魯賓施利斯接手後情況惡劣，近7仗未贏過，不過上場火併榜首阿仙奴，「聖人」被睇淡下踢出頑強鬥志，一度領先對手兩粒，到末段先被「兵工廠」逼和3比3，只要保持住呢份戰意，護級唔係冇希望，不過佢哋現時最重要就係要贏波，尤其今場面對護級對手之一嘅般尼茅夫，勢必空群而出搏殺，希望一舉擸晒3分。

般尼茅夫近兩仗作客連贏李斯特城同熱刺，得以脫離降班區域，但之後似乎因此鬆懈，上仗對韋斯咸淨吞4蛋，今仗匆匆再鬥修咸頓可能再出事。「般茅」今季防守欠穩，踢咗32場失63球，同列斯聯並列今季失波最多球隊，最大問題係經常早段先失波，修咸頓第一隊入球屬好路之選。