曼聯讓客「柏」案叫絕 昆士柏流浪近況頹到冇朋友,累積5場不勝兼夾兩連敗,今晚喺主場面對矢志反彈嘅曼聯,睇怕只能選擇坐以待斃,買紅魔鬼客勝得1.48倍冇肉食,不如大膽啲買2.45倍嘅「讓客」仲有分
曼聯讓客「柏」案叫絕
昆士柏流浪近況頹到冇朋友,累積5場不勝兼夾兩連敗,今晚喺主場面對矢志反彈嘅曼聯,睇怕只能選擇坐以待斃,買紅魔鬼客勝得1.48倍冇肉食,不如大膽啲買2.45倍嘅「讓客」仲有分頭啦!(周六9,now622台周六11:00pm直播)
足總盃喺主場俾英甲仔錫菲聯越級淘汰,另外喺英超就不敵護級競爭對手般尼,呢隊昆士柏流浪已經累積咗5場不勝,真係唔死都冇用,最慘係管理層不思進取,從未傳過佢哋不滿領隊哈利列納,唔肯求變嘅結果當然只有死路一條,加上里奧費迪南同埋辛度雲尼亞里等稍具卡士嘅球員繼續養傷,昆士柏流浪今晚想攞3分都難。
法卡奧誓證明身價
曼聯上周輸俾修咸頓,終止咗連勝走勢,不過上天似乎對佢哋不薄,本周安排咗昆士柏流浪呢支魚腩俾紅魔鬼即時反彈,雖然球隊增添咗尹佩斯呢位傷兵,不過領隊雲高爾會俾法卡奧打番正選,配合隊長朗尼攻堅,加上中場已經有戴利白蘭特傷癒復出,前中後嘅人腳都好平衡,而且喺往績方面,曼聯近6次作客昆士柏沌浪獲5勝1和不敗佳績,呢注「讓客」抵搏吖!