AC米蘭上盤「薩」無赦   意大利盃16強由AC米蘭主場迎戰薩斯索羅。AC米蘭歇冬後一場都未贏過，但上場僅和拖連奴其實只係教練恩沙基太保守所致，睇埋佢哋歇冬前先後贏拿玻里同和羅馬表現，陣容上文尼斯、艾沙拉維、蒙杜利禾同麥薩斯等三線主力都在陣，僅本田圭佑因替日本征戰亞洲盃唔踢得，再配合埋主場之利，相信要晉級唔難。（周二10，now633、660及無綫網絡電視13頻道周三4:00am直播） 薩斯索羅係今季意甲其中一支攔路虎，好多球隊遇着佢哋都會有麻煩，但呢個魔法近排好似開始失效，佢哋近5戰僅得一勝，仲作客輸俾巴勒莫，另主場先後失分俾切塞納同烏甸尼斯，表現有下滑跡象下，作客好難創造奇跡，要上盤。