Colun Lai：紅軍患「前鋒依賴症」未好過

英超最令人期待的「雙紅會」今晚上演，兩支英格蘭足球史上最成功的球會曼聯與利物浦又再碰頭，肯定有好戲睇。兩軍從來都是「有你冇我」，幾乎沒有在同一年代輝煌過，近年成績更是有段距離，我相信回勇的「紅魔鬼」可憑鋒力的分野，砌底再度下沉的「紅軍」，一報去季大敗之仇！

利物浦與曼聯，在歷史上從來都是「有你冇我」，廿多年前利物浦王朝終結，緊接的便是曼聯雄霸英格蘭球壇20多載；去季紅軍一度所向披靡、無限接近首個英超錦標，伴隨的，卻是紅魔鬼的沉淪。今季曼聯似有復甦之勢，其死敵亦理所當然地再次下沉至中游位置。無他，回想利物浦近年戰績稍好的球季，都有一位超級前鋒壓陣，00至01年的3冠王便在奧雲率軍下奪得；08至09英超屈居亞軍，是全盛期的費蘭度托利斯壓陣；去季則有「萬能射手」蘇亞雷斯獨力令紅軍「升呢」。

靠列基林拔係「笑話」
可惜多年以來，利物浦的「前鋒依賴症」完全沒有好轉迹象，回想上一個頻頻入球的中場，除謝拉特外已數不出第二個，想靠列基林拔及巴洛迪利入波，簡直是笑話。相反曼聯雙箭尹佩斯及朗尼雖已不年輕，但多年來在英超打滾，技術已爐火純青，「尹大將軍」近期狀態更是高峰，今晚曼聯絕對可憑進攻輕取啞火的紅軍。

(now 621周日晚9時30分直播)