意甲三連冠祖雲達斯今季明顯冇咁輕鬆，被次席羅馬追到僅領先三分，好消息係球隊已取得歐聯十六強席位，未來兩個月可以全力喺聯賽搏殺，今晚主場迎戰森多利亞，對三分志在必得，主W1.2倍熱爆燈。不過祖記一對中堅缺陣，防線有隱憂，建議揀入球大。 （TVB 301周日晚7時30分直播） 祖記前鋒泰維斯大勇，中場保羅普巴、維達爾後上攻門亦好有威脅。球隊原本後防水準亦唔錯，問題係繼巴沙利養傷後，另一位中堅基亞連尼今場停賽，教練阿里基需要變陣改踢四四二，代替基亞連尼位置嘅奧邦拿近年多數司職左閘，要佢出任中堅，實在令人難以放心，估計保唔住清白之身。 森多利亞三前鋒托弗 森多利亞戰術進取，三位前鋒艾達馬田斯、奧卡卡卓卡、加比亞甸尼上仗仲一齊入波。值得一提，首席射手加比亞甸尼兩年前失意於祖記，對住舊東家肯定特別落力，今仗有力再數胡，捧大盤啱數。