保羅戴巴拿弗爆 羅馬客Ｗ捧得過|東方日報

今晚意甲焦點之戰，烏甸尼斯主場對羅馬，由「寸王」摩連奴執教嘅羅馬今季簽入多位球星，整體實力獲得提升，聯賽開鑼後4戰取得3勝1和，今仗勢必乘勝追擊，加上雙方近4次交鋒，羅馬贏咗3次，今場客勝可取。（Now 638周一凌晨2時45分直播）

摩連奴獨具慧眼，喺今夏轉會市場為羅馬簽入多位猛將，包括以自由身加盟嘅保羅戴巴拿、尼曼查馬迪及比洛迪。當中以阿根廷國腳保羅戴巴拿表現最出色，佢早前倒戈鬥祖雲達斯，貢獻1次助攻，幫球隊逼和對手1比1，上仗更加梅開二度，為羅馬大勝蒙沙3比0。再配合譚美阿巴謙、羅倫素柏歷堅尼等原有骨幹球員，羅馬前中後三線實力平均，作客都可以踢進攻足球爭勝。

近4對賽3挫烏甸
雖然烏甸尼斯取得兩連勝，但都贏得好驚險，包括落後之下以2比1反勝新升班嘅蒙沙，上仗僅以1比0小勝費倫天拿，表現同羅馬有一段距離。事實上，烏甸尼斯近4次對羅馬，只有1和3負，明顯被對手食住，今仗就算有主場之利亦難以發圍。