拜仁讓主「馬」到功成

拜仁讓主「馬」到功成
 
歐聯E組賽事，拜仁慕尼黑只要喺主場擊敗羅馬攞3分，就可以提前兩輪率先出線16強，為免夜長夢多，相信呢支德甲巨人會先下手為強，足智彩開拜仁「讓主」得1.61倍，熱都要去「馬」！（周三1，有線62及202台周四3:45am直播）

唔夠兩個星期之前，拜仁先至喺奧林匹高球場屠殺羅馬7:1，相信唔少球迷都印象難忘，格食格加往績佔優，仲要喺安聯球場出擊，實在睇唔到拜仁有任何失分危機，更何況呢支德甲巨人只要攞多3分，就可以憑4戰全勝成績提早突圍分組賽，為免夜長夢多，相信拜仁一定唔會手軟，即使7:1好難歷史重演，打個5折都夠贏盤。

列貝利或復出踢國家隊

列貝利經理人表示，呢位球星唔一定永久退出法國隊，一切要視乎佢嘅心情，真係好鬼大牌，不過列貝利有番咁上下實力，又真係抵佢咁寸咀，雖然佢賽前番咗祖家奔喪，但就唔影響上陣對羅馬嘅機會，是役同復出嘅洛賓雙翼齊飛，湯馬士梅拿同埋羅拔利雲度夫斯基唔愁冇供應，而且拜仁上周喺德甲力克死對頭多蒙特，已經連續15場賽事保持不敗，想佢哋失手都幾難。

羅馬兩主力被挖損士氣

羅馬上周意甲不敵拿玻里0:2，意大利傳媒話呢支首都狼仲未走出慘敗拜仁嘅陰霾，最近踢起波上嚟無精打采，加上有消息指陣中兩位大將都被挖角，包括前鋒迪斯度同埋中場迪羅斯，後者仲證實收到祖雲達斯方面嘅報價，相信唔多唔少都會影響咗陣營內嘅士氣。其實羅馬目前嘅傷兵都幾多，文奴拿斯、艾斯托利、馬爾干、波里路、史杜特文同埋巴沙列堤都唔出得，聽講隊長托迪喺頻密賽程下亦大呻辛苦，畢竟佢年紀都唔輕，今晚作客安聯球場真係一大考驗。
足智彩開讓球主客和，拜仁「讓主」得1.61倍，雖然熱到冇乜胃口，但就反映出莊家信心，拜仁再殺「馬」可期。