維拉下盤「士」日重心

維拉下盤「士」日重心
 
英超今晚上演本周最後一戰，昆士柏流浪降班時都唔放走隊中球星，偏偏升番上英超就將所有有用球員放走晒，一堆老傷病弱殘打到包尾只可以講抵死，維拉季初銳氣已過，但近戰4連敗全負強手，今場更有賓迪基復出，至少攞1分受讓平半好抵玩。（周一8，now621台周二4:00am直播）

昆流本來前季買落買落，都仍然有格尼路、麥比亞、祖利奧施薩及雷米等人才，點知睇吓佢哋今季個陣容，真係擺出嚟嚇一跳，原來得啖笑，前線查理柯士甸，睇少啲波都唔識佢，中場仲係祖爾巴頓、卡蘭積卡，踢英冠都有啲勉強，後防仲過癮，有李察鄧尼、奧奴夏以及里奧費迪南，稍為有個跑得快嘅前鋒都可視佢哋如無物，當中李察鄧尼更經常幫對手打多個，上星期終於攻入生平第10個烏龍球，好老實英倫球員本身都唔掂，哈利列納仲鍾意用埋啲過氣英兵，咁季尾降班都合情合理啦！
其實睇到連艾拿戴斯嘅韋斯咸都開始轉打現代地面戰，哈利列納係咪真係咁食古不化係要高Q大棍呢？咁又未必嘅，睇佢上場對紅軍，一開波收起晒卡蘭積卡、華加斯等，似乎都係想輸多一兩場博炒啫，而睇嚟今次4連敗嘅維拉都可以成全佢啦！維拉季初一度上到第2位，但近戰又4連敗，都唔係佢哋狀態滑落得快嘅，只係對上4場波，係先後對愛華頓、車仔、曼城同阿仙奴，輸晒都冇辦法，其實佢哋輸呢4場前都仲係贏利物浦，好明顯遭遇連敗都係技不如人，所以今場就啱晒啦，連輸4場後班球員一肚悶氣，撞正昆流啱晒做出氣袋，呢場維拉真係有力贏埋。

維拉火力值得信賴

事實上，維拉火力係好值得信賴，除咗近季打起嘅艾邦拉賀同安祖斯韋文外，今場更有傷癒嘅賓迪基復出，對住昆流條老鬼防線自己入幾球，或博李察鄧尼再入一球都得，受讓點能夠唔買。