阿“柏”要發“維”

阿“柏”要發“維”

英超聯賽榜包尾嘅昆士柏流浪認真衰氣纏身，上場敗於利物浦腳下，簡直烏雲蓋頂，兩個烏龍波送大禮畀紅軍，其中一球更係臨完場前一刻“絕殺”，白白全失三分，繼續泥足深陷。球隊必須掙扎求存，今晚主場迎戰實力相若嘅阿士東維拉，誓要搶得一分得一分。

排十三位嘅維拉同樣為搶分而戰，可惜近況與昆士柏流浪相差無幾，四連敗不單止，失十一球兼零入球，防守脆弱，進攻乏力，今仗對住勢凶夾狼非要搶分不可嘅昆士柏流浪，維拉能夠和波已算功成身退。初盤昆士柏流浪讓平手／半球，不妨博主隊做“東”。對紅軍一戰，昆士柏流浪確應該係贏波一隊，全場與利物浦拉成均勢，可惜“烏龍王”鄧尼攻入英超生涯中第十個烏龍波，球友哥爾卡亦唔執輸，結果由贏變輸，但整體發揮明顯有很大改善，祇要踢出爭勝決心，即有機會搶足三分。

維拉之前輸畀阿仙奴、車路士及曼城，技不如人，輸波亦合理。不過三球大敗愛華頓腳下，畀人感覺球隊散開就散，今戰仍未係反彈時侯。

推介：昆士柏流浪1:0