意甲:伊巴傷愈ＡＣ大起拉素

今晚意甲前列大戰，「4哥」ＡＣ米蘭主場硬撼榜首拉素。ＡＣ雖有箭頭基奧特仍需隔離，但拉菲爾利亞奧、巴謙戴亞斯均極速上力，老將伊巴謙莫域亦好番或可候命，攻力未減，拉素在新教頭沙利領軍後更火力全開，加上兩軍近年碰頭例演入球騷，2.5球嘅大盤更值博。（Now638周一凌晨零時直播）上季亞軍ＡＣ開咧後聯賽兩戰全勝，雖然新加盟嘅箭頭基奧特確診新冠肺炎，今場唔出得，仍需隔離而缺席今仗，幸好拉菲爾利亞奧、巴謙戴亞斯亦成功開齋。仲有一個好消息，係5月做手術嘅伊巴謙莫域已經好番晒及跟操，今仗有機會先做後備，絕對可穩定軍心。拉素同樣開季2連捷，更加攻入9粒，最特別係兩仗均係反敗為勝，「王牌」恩莫比尼今季已入咗4球，呢位射手早前為意大利出戰兩仗世盃外都食白果，備受批評，之後更因傷退隊，據報佢只係小傷，今仗可復出，谷埋一肚氣，誓要用入波證明自己。雙方近4次碰頭，全開3球或以上，鬥攻格局實多波入，捧大盤好過。