日聯:攻守升呢鯨魚主場贏「德」

周五日職僅上演1場賽事，近況大勇嘅名古屋鯨魚主場迎戰德島漩渦。鯨魚經過夏天重點增兵之後，上個月開始擺脫低潮，成績突飛猛進，重燃爭奪來屆亞冠盃參賽資格希望，戰意同士氣一流。相反作客嘅德島漩渦愈踢愈沉，連入球能力都喪失，兩隊狀態一天一地，今場當然捧鯨魚主勝。（周五晚上6時開賽）名古屋鯨魚今季開咧6連勝係威係勢，但之後因為要分心應付亞冠盃分組賽，以致聯賽成績直線插水，表現令人失望。漩渦態沉喪吞蛋不過鯨魚喺夏天針對性引入兩名頂級球員，令成隊波表現回復生氣，有份為波蘭出戰歐國盃決賽周嘅前鋒施維亞索克7月以200萬歐元轉會費加盟，近4次上陣為球隊攻入3球，腳風正順；南韓中堅金眠泰亦喺上月來投，令鯨魚防守力大大增強，依家球隊攻守力量都得到明顯提升，因此近7場賽事豪取6勝1和佳績，狀態一流。德島漩渦表現持續低沉，而且仲有每況愈下嘅趨勢，佢哋近9場聯賽只有1勝1和7負，當中7場敗仗更加連破蛋嘅能力都欠奉，而且佢哋作客比賽已經連輸5場，擺明係作客蟲，今仗造訪氣勢如虹嘅鯨魚，睇怕漩渦都係難逃一敗。