三獅讓客「愛」不釋手

三獅讓客「愛」不釋手

歐國盃E組賽事，英格蘭食住個勢作客愛沙尼亞，有望添食再取3分，畢竟主隊有大將停賽，韋碧克同朗尼嘅腳風又咁順，預料贏兩至三球冇問題，「讓客」1.68倍「愛」不釋手。（周日7，有線61、64、201及203台周一12:00am直播）

愛沙尼亞喺E組已經踢咗兩場賽事，分別以1:0小勝斯洛文尼亞，另外作客立陶宛就輸0:1，球隊以國內聯賽球員為骨幹，配合幾位外流球員成軍，包括效力黑池嘅中場辛祖域、捷克奧斯達華嘅老將連達佩利，匈牙利迪比辛尼後衛馬路素夫，同埋德乙奧厄前鋒亨利安尼亞等，坦白講質素真係欠奉，而且後防重心卡拉斯迪喺對立陶宛一仗被逐，今晚自動停賽，情況令人擔心。

英格蘭入7球冇失過波

英格蘭喺分組賽已經連勝瑞士同埋聖馬力諾，合共轟入7球並保持不失，連續兩仗都有「士哥」嘅韋碧克表現最惹人好感，而佢嘅前曼聯拍檔朗尼都唔失禮，加上幾位中場好似阿歷士張伯倫、韋舒亞同埋佐敦軒達臣都頻頻有佳作，三獅軍團嘅進攻火力絕對唔講得笑，上次對聖馬力諾開五球半差少少先開出，今晚對愛沙尼亞應該可以波盤齊贏，撫慰捧場客嘅荷包同埋心靈，足智彩開讓球主客和，捧英軍「讓客」唔使諗！

立陶宛唔驚斯洛文尼亞

同組嘅立陶宛將會喺主場迎戰斯洛文尼亞，大家千祈唔好怕追寶尾，事關主隊立陶宛已經兩戰全勝，可謂氣勢凌人，今晚仲有得受讓平手、半球，簡直係全日心水精選，呢個下盤當然唔可以放過啦！（周日12，香港時間周一2:45am開賽）
立陶宛喺E組先後擊敗聖馬力諾同埋愛沙尼亞，雖然入波唔算多，但就勝在冇失過波，反映後防好穩陣，攻力唔突出嘅斯洛文尼亞根本就讓唔起。