歐國盃:丹麥疲兵係時候見底 英格蘭齊章強勢搶W

今晚歐國盃續演4強大戰，英格蘭於主場溫布萊球場迎擊丹麥。英格蘭今屆有前有後堅具冠軍相，位位球員處於佳態，令主帥修夫基有更多調動空間；丹麥場場搏甩髀漸露疲態，難擋近11仗贏10場嘅「三獅兵團」，一於熱捧主勝。（Now618及616周四凌晨3時直播）英格蘭今屆歐國盃5戰取得4勝1和未輸過，共轟8粒兼且保持不失，上仗8強對烏克蘭用番4231陣式，最終大破對手4比0。梅開二度嘅隊長哈利卡尼已累積3粒，拍住隊友史達寧，有望衝擊金靴獎；啱啱加盟曼聯嘅查頓辛祖代替布卡約沙卡擔正，盡顯突破力強特點，而佢未來球會隊友哈利馬古尼及勞基梳爾亦相當搶鏡，前者頭槌建功，梳爾則兩度交出助攻。咪忘記後備席仲有基亞利殊、菲爾科頓及上仗取得國家隊「處子」士哥嘅佐敦軒達臣候命，令修夫基有更多變陣籌碼。丹麥反搶戰術易踢殘丹麥自從發生基斯甸艾歷臣心臟病發暈倒球場事件後，大大激勵隊友鬥心，近3仗連贏俄羅斯、威爾斯及捷克，自1992年童話式奪冠後再闖歐國盃4強。丹麥一直用米希利、湯馬士迪蘭尼、賀積查治及巴夫韋迪等跑動力強嘅球員，今屆曾225次反搶成功奪回球權，係決賽周各隊之冠，但亦意味佢哋體能消耗極大，搏到殘殘哋，難同兵源充足嘅「三獅兵團」相比，加上今屆5戰只得一場冇失球，防守唔算穩陣。連同世盃外在內，英格蘭近11仗豪取10勝1和佳績，挾天時、地利及人和，有力繼1966年世盃後再闖大賽決賽，主勝有計。