兩巴對戰有“門”路
今晚只有場法甲睇得吓，巴黎聖日門對巴斯蒂亞，聖日門今季落重本投資，當然希望得到回報，暫時以三分優勢領先里昂，要重奪錦聯賽標絕對不能大意失分，以法甲超班人腳，再加上主場之利，要殺退對手應該“依絲執”。
唔好話我八婆！新年流流，巴斯蒂亞個名認真唔好意頭，“包輸幾吓”，即係輸一吓都唔夠，仲要輸多幾吓，賭錢真係大吉利是，講笑啫！但以巴蒂亞實力的確難與聖日門抗衡，近五次對賽輸足五場，首循環主場更慘吞四蛋，今仗要求唔高，只望輸少當贏，初盤聖日門讓兩球／兩球半，推介聖日門“斯”殺對手。
除“萬人迷”碧咸外，聖日門亦簽入一名九十後新星M盧卡斯，貴為巴西國腳當然有料到，加上伊巴謙莫域、拿維斯、泰亞高施華、文尼斯及雲達韋爾等份量級球星，足以稱霸法甲，聖日門下周中要踢歐冠盃作客華倫西亞，今仗誓要大炒對手以壯聲威。
巴斯蒂亞聯賽共失四十七球，法甲中排名“首位”，可想而知防守能力形同虛設，今仗實在難逃大敗。
推介：巴黎聖日門4：0
