德甲:奧堡鬥攻大無畏 主場打仁例多波入

奧堡鬥攻大無畏主場打仁例多波入今晚德甲續演快車，榜首拜仁慕尼黑作客鬥奧格斯堡。奧格斯堡整體實力雖不及拜仁，不過近年喺主場迎戰呢支班霸都冇怯場，經常大踢進攻足球主動求勝；拜仁今季後防表現失準，惟有進一步加強進攻填補防線漏洞；既然「奧堡」近6次聯賽主場對拜仁全開4球或以上，一於捧中位數3.5球大盤。（周四凌晨3時30分開賽）奧格斯堡近況認真麻麻，上場聯賽以0比2不敵雲達不來梅，聯賽連盃賽近5場輸4場，而且自從去年10月尾喺主場擊敗緬恩斯後，佢哋對上6仗主場只得2和4負，今場要喺拜仁身上搶分難度極高。不過佢哋近6次聯賽主場對拜仁只有1次冇入波，總入球全部開4球或以上，充滿大無畏精神，而且球隊上季中起用前多蒙特名將、曾經執教利華古遜嘅靴列治領軍後，踢法變得更為進取，今季聯賽主場就曾經殺敗勁旅多蒙特，今場唔怕繼續與拜仁鬥攻。拜仁作客防線曳拜仁踏入2021年作客接連失利，先喺聯賽2比3輸畀慕遜加柏，德國盃第2圈對住乙組仔基爾更加倒灶出局。雖然上場聯賽主場以2比1險勝弗賴堡，但後防欠穩問題依然未改善，以佢哋今季8場聯賽作客場場有失波、共失14球嘅水準，今場睇怕難保清白之身。拜仁防線雖然跌Watt，好彩王牌前鋒羅拔利雲度夫斯基依然保持高效，今季聯賽已轟入21球，打破咗德國傳奇射手梅拿保持嘅半季入球紀錄，依家正向單季攻入40球嘅聯賽最多入波紀錄進發；既然兩軍同樣攻強守弱，相信今場會有唔少入波出現，捧3.5球入球大最好路。