英超:倫敦打吡熱刺惡晒

倫敦打吡熱刺惡晒攻守兼備去水晶宮踩場今晚英超重頭戲梗係倫敦打吡——水晶宮主場硬撼1哥熱刺。熱刺兩大球星哈利卡尼及孫興民弗到爆燈，兩人拍住上可謂無堅不摧，主帥摩連奴着重防守風格未改，造就熱刺成為今季英超失球最少、反擊力超強嘅球隊，加上近10次聯賽剋死同市嘅水晶宮，客勝有買趁早。（Now621周日晚10時15分直播）熱刺由11月下旬開始面對英超魔鬼賽程，之前已經惡鬥曼城、車路士同阿仙奴，今仗對水晶宮稍有喘息機會，之後又要對住利物浦同李斯特城。不過，熱刺喺主帥摩連奴帶領下愈戰愈勇，魔鬼賽程首3仗獲2勝1和，以2比0擊敗曼城同阿仙奴，同車路士互交白卷，依家聯賽11戰得24分，未計周六賽事以得失球差力壓同分嘅利物浦排榜首。哈神搭老孫無堅不摧當然，王牌哈利卡尼同孫興民今季超強把握力非常關鍵，「哈神」聯賽入咗8粒，孫興民更有10球進帳，上場鬥阿仙奴兩人包辦2個入球，熱刺今季23個英超入波中，有11球由兩人互相助攻取得，堅有默契。中游分子水晶宮，上仗於韋費特沙夏復出帶領下，以5比1大勝西布朗，不過西布朗只係下游球隊，仲要打少個搞到末段崩潰，因此大勝不足為據。今季熱刺成功之處，除咗前線孖寶弗到震之外，後防更係固若金湯，今季只失9粒，係英超失球最少一隊，預料水晶宮很難喺熱刺身上取得入球，何況熱刺近10次聯賽對水晶宮，豪取9勝1和未輸過，擺明食住對手，客勝不容錯過。